'දිනේෂ් පාර්ලිමේන්තුවේ දාන සද්ද ජිනීවා වලදී නැහැ. හරිම අහිංසකයි'' - කලම්බු ටෙලිග්‍රාෆ් කර්තෘ කියයි

'දිනේෂ් පාර්ලිමේන්තුවේ දාන සද්ද ජිනීවා වලදී නැහැ. හරිම අහිංසකයි'' - කලම්බු ටෙලිග්‍රාෆ් කර්තෘ කියයි

විදේශ ඇමති දිනේෂ් ගුණවර්ධන පාර්ලිමේන්තුවේ දාන සද්ද ජිනීවා වලදී නොදැමූ බවත් හරිම අහිංසක ලෙස අදහස් දැක්වූ බවත් 'කලම්බු ටෙලිග්‍රාෆ්' කර්තෘ ජ්‍යෙෂ්ඨ මාධ්‍යවේදී උවිඳු කුරුකුලසූරිය පවසයි.

ඔහු සිය FB පිටුවේ එවැනි සටහනක් පළකර ඇත්තේ, ''බොරලුගොඩ සිංහයා ජිනීවා හොල්ලයි.. රට දණ ගැස්වූ යෝජනාවෙන් ඉවත් වෙන බව UNHRC අමතමින් කියයි..'' යයි ආණ්ඩුවේ මාධ්‍ය සිරස්තල යොදමින් වාර්තා පළකර තිබියදීය.

'කලම්බු ටෙලිග්‍රාෆ්' කතුවරයා සිය FB සටහනේ මෙසේ සඳහන් කර තිබේ.

''පාර්ලිමේන්තුවේ දාන සද්දෙ නැහැ එතන ගියාම දිනේශ් ලොක්කගේ. හරිම අහිංසකයි ! මම හිතුවෙ ඇමරිකාව වගේ මානව හිමිකම් කවුන්සෙලෙනුත් අයින් වෙනව කියල උගුර කඩාගෙන ටෝක් එකක් දෙයි කියලා. සියලු සත්වයෝ, නිදුක් වෙත්වා, නිරෝගී වෙත්වා, සුවපත් වෙත්වා කියල ඉවර කරේ කතාව. නිවන් දකිත්වා කියන එක කිව්වෙ නැහැ ලොක්කා. ''

ඇමති දිනේෂ් ශ්‍රී ලංකාවේ ස්ථාවරය කියයි

සමාජ මාධ්‍ය ඔස්සේ එසේ විවිධාකාරයේ අදහස් පළවුවද, ජිනීවා නුවර පැවැත්වෙන එක්සත් ජාතීන්ගේ මානව හිමිකම් මණ්ඩලයේ 43 වෙනි සැසිවාරය අමතමින් විදේශ අමාත්‍ය දිනේෂ් ගුණවර්ධන පැවසුයේ, ශ්‍රී ලංකා රජයේ සම අනුග්‍රාහකත්වයෙන් සම්මත කරන ලද යෝජනාවෙන් ඉවත්වන නමුත් තිරසාර සාමයක් සහ සංහිඳියාවක් සඳහා යන ගමනට අවශ්‍ය වගවීම සහ මානව හිමිකම් සම්බන්ධයෙන් ජනතාව ලබා දුන් ඉලක්ක ජය ගැනීම පිණිස ශ්‍රී ලංකාව තවදුරටත් කැප වන බවයි.

ඒ අනුව 2019 මාර්තු මස ශ්‍රී ලංකාවේ සම අනුග්‍රහයෙන් සම්මත කර ගන්නා ලද "සංහිඳියාව, වගවීම සහ මානව හිමිකම් ප්‍රවර්ධනය" මැයෙන් යුත් 40/1 යෝජනාවෙන් ඉවත්වීමට ශ්‍රී ලංකාව තීරණය කළ බව අමාත්‍යවරයා මානව හිමිකම් මණ්ඩලයට දැනුම් දුන්නේය.

40/1 යෝජනාව තුළ 2015 ඔක්තෝම්බර් මස ඉදිරිපත් කළ 30/1 සහ 2017 මාර්තු මස ඉදිරිපත් කළ 34/1 පූර්වගාමී යෝජනා මත පදනම් වී සහ එම යෝජනා ද අන්තර්ගත වී තිබේ.

ශ්‍රී ලංකා රජයේ ඇති කැපවීම !

පළමුව රජයේ ප්‍රතිපත්ති රාමුව අනුගමනය කරමින් දැනට පවත්නා යාන්ත්‍රණ යෝග්‍ය පරිදි අනුවර්තනය කර ගැනීම ඇතුළු සියල්ල අන්තර්ගත, දේශීය වශයෙන් නිර්මාණය කර ක්‍රියාත්මක කෙරෙන සංහිඳියා සහ වගවීමේ ක්‍රියාදාමයක් ඔස්සේ තිරසාර සාමය ළඟා කර ගැනීමට ශ්‍රී ලංකා රජයේ ඇති කැපවීම ප්‍රකාශයට පත් කරන බවත් අමාත්‍ය දිනේෂ් ගුණවර්ධන එහිදී කියා සිටියේය.

මානව හිමිකම් හා ජාත්‍යන්තර මානූෂීය නීතිය උල්ලංඝනය වීම් පිළිබඳ චෝදනා විමර්ශනය කළ පූර්ව ශ්‍රී ලාංකික විමර්ශන කොමිසම් වාර්තා සමාලෝචනය කිරීමටත්, ඒවායේ නිර්දේශ ක්‍රියාත්මක කිරීමේ ප්‍රගතිය තක්සේරු කොට නව රජයේ ප්‍රතිපත්තිය ප්‍රකාර ක්‍රියාත්මක කරනු පිණිස, ක්‍රියාත්මක කළ හැකි පියවර යෝජනා කිරීමටත්, ශ්‍රේෂ්ඨාධිකරණයේ විනිශ්චයකාරවරයකු යටතේ විමර්ශන කොමිසමක් පත් කරන බව ද ඇමතිවරයා සඳහන් කළේය.

දෙවනුව 2030 තිරසර සංවර්ධන න්‍යායපත්‍රය ද ඇතුළු ශ්‍රී ලංකාව සතු බැඳීම්වලට ගැළපෙන ආකාරයකින්, නිසි ප්‍රජාතන්ත්‍රවාදී හා නෛතික ක්‍රියාදාම ඔස්සේ, මෙතෙක් නොවිසඳී ඇති ගැටලු නිරාකරණය කිරීම හා අවශ්‍ය ආයතනික ප්‍රතිසංස්කරණ හඳුන්වා දෙන බවත් අමාත්‍ය දිනේෂ් ගුණවර්ධන එහිදී කියා සිටියේය.

ඔහු පවසන පරිදි, නීතිය යටතේ පුද්ගල හා සාමූහික අයිතිවාසිකම් මෙන්ම ආරක්ෂණ ප්‍රගමනය කිරීමෙන් ද, යුක්තිය හා සංහිඳියාව සහතික කිරීමෙන් හා සමාජයේ සිටින අනතුරට භාජනය විය හැකි කොටස්වල ගැටලුවලට විසඳුම් ලබාදීමෙන් ද, ජනතාව කෙරෙහි රජය තුළ ඇති කැපවීමෙන් පැනනැඟෙන ප්‍රතිපත්ති යහපත් චේතනාවෙන් යුතුව ප්‍රදර්ශනය කිරීම ද ඊට ඇතුළත් වේ.

2030 තිරසර සංවර්ධන න්‍යායපත්‍රය ක්‍රියාත්මක කිරීම සඳහා ශ්‍රී ලංකා ආණ්ඩුවට උපකාර කරනු වස් එක්සත් ජාතීන්ගේ අදාළ ආයතන සම්බන්ධ කර ගැනීම සඳහා ජනාධිපති ගෝඨාභය රාජපක්ෂ සහ එක්සත් ජාතීන්ගේ නේවාසික සම්බන්ධීකාරකවරිය අතර පසුගියදා පැවති සාකච්ඡාවේදී එකඟ වූ බවත් ඇමතිවරයා සිහිපත් කළේය.

එක්සත් ජාතීන්ගේ සංවිධානයේ සාමාජික රාජ්‍යවල සහයෝගය ඇතිව යෝජනා සම්මතය අවසන් කිරීමට කටයුතු කිරීම සඳහා ශ්‍රී ලංකාව කටයුතු කිරීමට බලාපොරොත්තු වන බවත් ඔහු පැවසීය.

කුමක් ද මේ 30/1 යෝජනාව?

බ්‍රිතාන්‍යය, ඇමෙරිකා එක්සත් ජනපදය සහ ශ්‍රී ලංකාවේ සම අනුග්‍රහයෙන් ඉදිරිපත් කෙරුණු 30/1 යෝජනාව 2015 මාර්තු මාසයේ එක්සත් ජාතීන්ගේ මානව හිමිකම් මණ්ඩලයේදී සම්මත කෙරිණි.

එක්සත් ජාතීන්ගේ මානව හිමිකම් සම්මේලනයේ 30/1 යෝජනාවලිය අනුව ශ්‍රී ලංකා රජය එකඟ වී ඇති කරුණු 9 :

1- කාලානුරූපී අධිකරණ ක්‍රියාවලියක් සඳහා පුළුල් ජාතික උපදේශකත්වයක් ලබා දීම

2 -සත්‍යය, නීතිය, සංහිඳියාව සහ යළි ගැටුම් ඇති නොවීම සම්බන්ධයෙන් කොමිසමක් ස්ථාපනය කිරීම

3 -අතුරුදන් වූවන් පිළිබඳ කාර්යාලයක් ස්ථාපනය කිරීම

4 -වන්දි ගෙවීම් කාර්යාලයක් ස්ථාපනය කිරීම

5 -එල්ටීටීඊ සංවිධානය විසින් සිදු කරන ලද ප්‍රචණ්ඩ ක්‍රියා සහ අපචාර විමර්ශනය කිරීම

6 -විශේෂ උපදෙස් මත ක්‍රියාත්මක අධිකරණ යාන්ත්‍රණයක් ස්ථාපනය කිරීම‍

7 -අධිකරණ සහ නීතිමය ආයතන මෙහෙයවීම සඳහා අවංක සහ අපක්ෂපාතී පුද්ගලයින් පත් කිරීම

8 -ජාත්‍යන්තර විනිසුරුවරුන්, නීතිවේදීන්, නීතිඥයන් සහ විමර්ශකයන් ඒකාබද්ධ කිරීම සඳහා විශේෂ නීති සම්පාදනය කිරීමට දෙමුහුන් විශේෂ අධිකරණයක් ස්ථාපනය කිරීම

9 -කාලානුරූපී අධිකරණ ක්‍රියාවලිය සඳහා ජාත්‍යන්තර පාර්ශවකරුවන්ගෙන් මූල්‍යමය, ද්‍රව්‍යමය හා තාක්ෂණික සහය ලබා ගැනීමට අවසර දීම

මේ අතර, යුද අපරාධ සහ මානව වර්ගයාට එරෙහි අපරාධ චෝදනා සම්බන්ධයෙන් ජාත්‍යන්තර විනිසුරුවරුන්, නීතිවේදීන්, නීතිඥයන් සහ විමර්ශකයන් ඒකාබද්ධ කිරීම සඳහා විශේෂ නීති සම්පාදනය කිරීමට දෙමුහුන් විශේෂ අධිකරණයක් ස්ථාපනය කිරීම ද නිර්දේශ අතර විය.

මින් ඇතැම් නිර්දේශ ක්‍රියාත්මක කර ඇති අතර ඇතැම් ඒවා ක්‍රියාත්මක වී නැත. දුර්වල මට්ටමින් ක්‍රියාත්මක වන නිර්දේශයන් ද පවතී.

වැරදිකරුවන්ට දඬුවම් දීමට අපොහොසත්වීම:

අමාත්‍ය දිනේෂ් ගුණවර්ධනගේ ප්‍රකාශය ගැන ට්විටර් ඔස්සේ අදහස් දක්වමින් මානව හිමිකම් නීතිවේදිනී භවානි ෆොන්සේකා පවසන්නේ මානව හිමිකම් උල්ලංඝනයන් සම්බන්ධයෙන් වැරදිකරුවන්ට දඬුවම් දීමට අපොහොසත්වීම ගැන ඇමතිවරයා සම්පූර්ණයෙන්ම නොසලකා හැර ඇති බවය.

විශේෂයෙන්ම තවත් පරීක්ෂණ කොමිසමක් පිහිටුවීම වැරදිකරුවන්ට දඬුවම් නොකිරීමේ ක්‍රියාදාමයේ දිගුවක් බව ඇයගේ අදහස වී තිබේ.

යුද අපරාධ චෝදනා එල්ල වී තිබෙන රාජපක්ෂ පාලනය ඒ සම්බන්ධයෙන් වගවීම ක්‍රියාත්මක කරනු ඇතැයි බලාපොරොත්තු විය නොහැකි බව හියුමන් රයිට්ස් වොච් සංවිධානයේ ජෝන් ෆිෂර් පවසා තිබුණි.

විදේශ කටයුතු පිළිබඳ අමාත්‍ය දිනේෂ් ගුණවර්ධන පෙබරවාරි 28 වෙනිදා මානව හිමිකම් පිළිබඳ මහ කොමසාරිස් මිෂෙල් බැෂලේ හමුවීමට නියමිත අතර පෙබරවාරි 27 වෙනිදා, ඉදිරිපත් කෙරෙන ගැටලුවලට ප්‍රතිචාර දැක්වීමට නියමිත බවත් රජයේ ප්‍රවෘත්ති දෙපාර්තමේන්තුව සඳහන් කරයි.

එක්සත් ජාතීන්ගේ මානව හිමිකම් මහ කොමසාරිස්වරිය මතු කළ කරුණු:

එක්සත් ජාතීන්ගේ මානව හිමිකම් පිළිබඳ මහ කොමසාරිස් මිෂෙල් බැෂලේ විසින් ශ්‍රී ලංකාව සම්බන්ධයෙන් මානව හිමිකම් කවුන්සිලයේ සැසි වාරයට ඉදිරිපත් කිරීමට නියමිත වාර්තාවක කරුණු රැසක් මතු කර තිබේ.

ඇය එම වාර්තාවෙහි සඳහන් කර ඇත්තේ, 30/1 යෝජනාවට අනුකූලව සංහිඳියාව, වගවීම සහ මානව හිමිකම් ප්‍රවර්ධනය කිරීමේදී ශ්‍රී ලංකාව යම් ප්‍රගතියක් ලබා ඇති බවය.

එහෙත්, ශ්‍රී ලංකා ආණ්ඩුව දඬුවම් ලබා දීමට අපොහොසත් වීම හා ආයතන ප්‍රතිසංස්කරණය කිරීමට දක්වන නොහැකියාව නිසා මානව හිමිකම් උල්ලංඝණයවීම් නැවත ඇති වීමට හේතු විය හැකි බව එහි සඳහන් කර තිබේ.

මේ අතර, ශ්‍රී ලංකාව සම්බන්ධයෙන් ක්‍රියාත්මක 30/1 යෝජනාවලිය සම්පූර්ණයෙන් ක්‍රියාත්මක කිරීම ප්‍රවර්ධනය කිරීම සඳහා ශ්‍රී ලංකා රජය සමග එක්ව කටයුතු කරන ලෙසත්, ශ්‍රී ලංකාවේ ප්‍රගතිය සමීපව නිරීක්ෂණය කරන ලෙසත් මානව හිමිකම් පිළිබඳ මහ කොමසාරිස්වරිය මානව හිමිකම් කවුන්සිලයෙන් ඉල්ලා තිබේ.

දෙමළ ජාතික සන්ධානය:

අදාළ යෝජනාවෙන් ඉවත්වීමට කටයුතු කළත් එක්සත් ජාතීන්ගේ සංවිධානයේ මානව හිමිකම් කවුන්සලයේදී වත්මන් රජයට ඒ වෙනුවෙන් වගකීමට සිදුවනු ඇති බව දෙමළ ජාතික සන්ධාන නායක ආර් සම්බන්ධන් මන්ත්‍රීවරයා පසුගිය 22 වෙනිදා පැවසීය.

යාපනයේ පැවති මාධ්‍ය හමුවකදී ඔහු කියා සිටියේ අදාළ යෝජනාවෙන් ශ්‍රී ලංකාව ඉවත් වුවත් එම යෝජනාවට ඉන් බලපෑමක් නොවනු ඇති බවය.

වත්මන් රජය එවැනි තීන්දුවක් ගනු ලැබුවේ එළෙඹෙන මහ මැතිවරණයේ දී දකුණේ ඡන්ද ඉලක්ක කර ගෙන යැයි පාර්ලිමේන්තු මන්ත්‍රී එම් ඒ සුමන්දිරන් එහිදී පවසා තිබිණි.

(උපුටා ගැනීම් : බීබීසී සිංහල සේවය)